A review by basynightshade
العمى by José Saramago

5.0

" ماذا لو فقدت البشرية بالكامل القدرة علي الرؤية .. إلا فرد واحد فقط "

العمي .. جوزية سارماغو كانت أول رواية انتهي منها بعد فترة الإمتحانات ..
الرواية بتصور حالة إنسانية و نفسية سواء بفكرة فقدان الرؤية وحياة العجز الإضطرارية أو حالة الهستيريا الجماعية أو " هستيريا القطيع " كما اسميها لمجموعة من البشر محتجزين في مكان واحد ..

اسلوب سارماغو بيعتمد إعتماد كلي علي الوصف , وصف المحيطات , الشخصيات , النفسية , النظرة الفلسفية سواء للكاتب أو لشخصيات الكتاب , وعلي عكس أعمال كتير لكُتاب آخرين طريقة سرده غير ممله و مفيدة فعلاً ..

- الفكرة الأساسية للرواية هي العمي , لو لسبب مجهول كل البشر فقدوا القدرة علي الرؤية , العالم هيكون شكله ازاي ؟ , كل شخصيات الرواية كانت عمياء إلا شخصية واحدة بس , كان لديها القدرة علي الرؤية و علي معرفة طريقة حياة الآخرين ..

- الفوضي , في البداية الفوضي اللي احدثها شخص واحد و بعدها الفوضي بين مجموعة محتجزين يليها الفوضي علي مستوي أكبر , تصوير الفوضي كان قوي و بشع في نفس الوقت , مشاعر الخوف و القلق و التقزز و السعادة و البراءة و الكراهية , كل حرف تم وضعه في الرواية هيوصل للقارئ بلا مبالغة ..

-هستيريا الإحتجاز خصوصاً لو بين مجموعة من الغرباء غير قادرين علي الهرب , البقاء الاضطراري , قرأت عمل واحد قبل كده بيناقش الفكرة دي و هو " The mist" لستيفن كينج , تخيل انك محتجز مع فئات من الناس عالية و فئات اقل مستوي و فئات غير متعلمة و مثقفة و وضيعة و مخلصه , كل انواع الشخصيات اللي ممكن تتخيلها اصبحت مجبرة فجأة علي الحياة تحت سقف واحد ...

دلوقتي تخيل بقي إنهم مجبرين علي الحياة تحت سقف واحد من غير القدرة علي الرؤية ..

- فكرة عدم استخدام اسماء كانت عظيمة , الإشارة للشخصيات بوضعهم الوظيفي كإن الراوي بيقول " ممكن الشخصية دي تكون اي حد .. ممكن تكون انت " , فكرة مختلفة جداً مقابلتنيش في أي عمل ادبي تاني ..

نهاية الرواية كانت قوية جداً , و منطقية جداً ومناسبة لإختتام الكم الهائل من الألم بين صفحات الكتاب ..

ملحوظة : فضلت يومين بعد ما انتهيت منها قلقانة من النوم و في رأسي فكرة لو غمضت عيني وفتحتها لقيت العمي وصلي , هتكون الحياة شكلها ايه ؟ ..